July 12, 2025 | 12:20 Timor Leste
DILI, www.news-viptv.com – Komisaun Organizadora XII Jogos Desportivos CPLP 2025 informa katak delegasaun husi Guine-Bissau sei to’o iha Timor-Leste iha 14 Jullu 2025.
Ba jornalista sira hafoin inkontru ministerial komisaun organizadora nian, Koordenador Jeral Jogos Desportivos CPLP 2025 atual Sekretariu Estadu Arte no Kultura, Jorge Soares Cristovão esplika mos katak, ba delegasaun nasaun seluk sei mai iha 16 no 17 Jullu 2025.
“Ita hatene katak semana ida nia laran tan, jogu nee sei realiza, ita nia delegasaun sira hotu dei tama iha ne’e, no iha loron 14, ita nia delegasaun husi Guine-Bisau sei to uluk mai, no iha loron 16 husi angola no Cabo-Verde mak sei mai, no iha 17 delegasaun hotu-hotu sei to ona iha Timor-Leste,” hateten membru governu ne’e, Sexta (11/7/2025), iha Edifisu MJDK Lecidere Dili.
Kona ba inkontru ministerial, koalia liu kona ba preparasaun ikus liliu iha area seguransa, infraestrutura, saude no edukasaun
“Ohin ita husi parte seguransa, Saùde, Edukasaun, ita hare ona oinsa maka ,ita bele servisu konjuntu atu simu delegasaun sira ne’e. Oinsa mak hare atu transporta ita nia delegasaun sira husi Aeroporto ba Hotel, no husi Hotel ba iha fatin atividade jogu nian. Ita deskuti mos planu seguransa oinsa maka atu halo atuasaun, atu fo seguransa masimu ba ita nia eventu ida ne’e, no ita deskuti mos plany Saùde ne’ebe iha emerjensia ruma atu nune’e saude bele halo servisu ruma,’ nia hateten.
Husi membru nasaun CPLP 9, Brasil no Guine Equatorial informadu ona katak la partisipa iha festa desportivos ne’e.
Membru governu ne’e mos apela ba ba povu no publiku sira hotu no ba Autoridade lokal sira, atu hatudu imajem Timor nian katak, timor iha Paz , estabilidade, tamba ida ne’e mak ita presija hatudu nafatin, pas, estabilidade no hakmatek atu nune’e ema bele dehan timor laos nasaun frajil ida.
