July 30, 2025 | 20:50 Timor Leste
𝐄𝐑𝐌𝐄𝐑𝐀, www.news-viptv.com – Autoridade Seguransa Polísia Nasionál Timor-Leste (PNTL) Munisípiu Ermera prende Bebidas kontra-bandu ou illegal ne’ebe sidadaun mane rua ho inisial CDM no FS hatama hosi fronteira.
Iha publikasaun PNTL nian loron 30 Jullu 2025, bebidas ne’ebe prende ho marka F (Bebidas ai-fuan) hamutuk carton 199 no M (bebidas susu been) carton 300 no total hamutuk carton 499.
Tuir informasaun ne’ebé autoridade seguransa PNTL Munisípiu Ermera simu husi sidadaun balun sasán bebidas hikas ne’e hatama mai Timor-Leste laiha dokumentu legal, hafoin sidadaun ho inisial CDM hanesan sasán nain tula ho karreta truk ida ho sapa matrikula A. 53.031 TL ne’ebé kondus husi Kondutor ho inisial FS husi Fronteira Bobonaro tama mai area Juridiku Munisípiu Ermera iha Hatulia Ilegal, tanba laiha dokumentus.
Bainhira Komandante PNTL Munisípiu Ermera Superintendente Polísia Ludgerio Picancio Madeira Lay ho Segundu Komandante PNTL Munisípiu Ermera Superintendente Assistente Polísia Martinho de Deus simu tiha informasaun ne’e orientá kedas Seksaun Transito Seguransa Rodaviariu ne’ebé lidera husi Inspektur Polísia Afonso Alberto ho Sarjentu Xefe Polísia Julio dos Santos hamutuk ho ekipa halo check point iha estrada públiku Glenu konsege indentifika Kareta truk ida ne’ebé tula sasán Kontrabadu ilegal tama mai iha area Juridiku Munisípiu Ermera laiha dokumentu.
Hafoin autoridade seguransa PNTL Munisípiu Ermera prende tiha Kareta ne’e halo kedas prosesu indentifikasaun ba kondutor ho naran inisial FS ho nain ba sasán Bebidas Floradina ho Milku ho inisial CDM iha komandu PNTL Munisípiu Ermera.
Iha prosesu indentifikasaun nain ba sasán deklara sasán ne’e hatama husi nasaun viziñu indonesia mai Timor-Leste nia destinasaun ikus atu ba faan ona Munisípiu Manufahi, nune’e iha oras 12 nia laran halo indentifikasaun remata liberta hikas Kondutor ho sasán nain haruka fila ba uma evidensia bebidas Floradina ho Milku Hamutuk ho karreta kontinua asegura iha edifisiu komandu PNTL Munisípiu Ermera hodi aprezenta ba Ministru Públiku kontinua prosesu tuir lei ne’ebé vigóra iha Timor-Leste.
