July 10, 2025 | 13:32 Timor Leste
DILI, www.news-viptv.com – Polisia Nasional Timor-Leste (PNTL) liu husi operasaun konjunta konsege kaptura Timoroan nain 91 ne’ebe ultrapasa ho ilegalmente ba Indonezia hodi partisipa iha Graduasaun Arte Marsiais balun nian.
Iha konferensia imprensa, Porta Voz Komandu Polísia Nasional Timor-Leste (PNTL) Superintendente Polísia João Belo dos Reis hateten Operasaun konjunta ne’ebe maka ekipa konjunta halo iha semana kotuk iha area liña fronteira Terrestre nian hodi bele identifika, monotoriza movimentu ita nia sidadaun sira ne’ebe sai tama iha liña fronteira.
“Husi rezultadu operasaun ne’ebe ekipa halo hodi ajuda ita nia maluk Unidade Patrullamentu Fronteira (UPF) sira iha ne’eba tanba rekursu limitadu, nune’e ita konsege detekta, kaptura no prende aktividade ilegais ne’ebe halo iha liña fronteira, primeiru ema hamutuk na’in 91 sidadaun Timor oan ita kaptura iha liña fronteira ho atributu Arte Marsias ne’ebe indika katak sidadaun sira ne’e ultrapasa liña fronteira ilegalmente ho intensaun atu tuir Graduasaun ba Arte Marsias balun,” informa Superintendente Polisia JB. Reis ba jornalista sira, Kuarta (9/7/2025), iha Kuartel Jeral PNTL, Kaikoli, Dili.
Nia informa tan, ekipa mos prende osan ho montante besik dollar rihun rua resin hamutuk ho Senapan Angin ne’ebe sidadaun Timor oan husi nasaun viziñu lori tama mai Timor-Leste.
“Ekipa mós prende Asu balun ne’ebe ita nia sidadaun Timor oan balun lori husi nasaun viziñu hodi tama mai Timor-Leste, atu fó hanoin ba sidadaun hotu katak moras Asu nian ho naran Rabies lao hela iha Timor-Leste, nune’e husu atu evita importa kualkér animal liu-liu Asu, husi nasaun viziñu mai iha ne’e tanba bele fó risku ba ita nia animal sira iha ita nia teritoriu tomak”, esplika Diretúr DSIKN ne’e.
Ofisias Superior PNTL ne’e apela ba sidadaun hotu katak movimentu iha liña fronteira tenke tuir prosedimentu legais ne’ebe maka nasaun ne’e iha, laiha autorizasaun atu liu ho dalan illegal.
“Prosedimentu hotu karik iha violasaun ruma, autoriedade seguransa ho nia aliadu ka parseiru sira hotu sei atua ho rigoroju,” nia dehan.
