August 20, 2025 | 09:52 Timor Leste
DILI, www.news-viptv.com – Prezidente no Laureadu Nobel ba Pás, Jose Ramos-Horta, formalmente simu Karta Kredénsiál husi Ricardo Jose Lustosa Leal, Embaixadór Estraordináriu no Plenipotensiáriu foun husi Repúblika Federativa Brazil mai Timor-Leste.
Serimónia ne’e hala’o iha, Tersa (19/8/2025), iha Palásiu Prezidensiál Nicolau Lobato, hodi reafirma lasu diplomátiku ne’ebé metin entre nasaun rua ne’e.
Embaixadór Ricardo Jose Lustosa Leal maka diplomata kareira distintu ida ho esperiénsia barak iha servisu estranjeiru Brazil nian. Durante nia mandatu, nia serbi iha misaun diplomátika xave sira, inklui Ramallah, Vatikanu, Cabo Verde, no Londres.
Nia kontribui ona ba publikasaun akadémiku sira, no hetan ona promosaun dala barak iha korpu diplomátiku nia laran tanba nia servisu meritóriu, subliña ninia dedikasaun hodi avansu parseria globál sira Brazil nian.
Dezde estabelese relasaun diplomátika iha 20 Maiu 2002, Timor-Leste no Brazíl aprofunda ona kolaborasaun iha área edukasaun, defeza, administrasaun públika, saúde, no agrikultura. Brazíl hala’o ona knaar sentrál hodi fó apoiu ba Timor-Leste nia setór justisa, formasaun profisionál, no ensinu superiór, inklui estabelesimentu programa Mestradu iha Universidade Nasionál Timor-Leste (UNTL). Estudante timoroan liu 130 no bolseiru relijiozu mós hetan benefísiu hosi interkámbiu akadémiku iha Brazil, ne’ebé refleta kompromisu ba kooperasaun Sul-Sul no dezenvolvimentu mútua.
Prezidente Ramos-Horta afirma:“Timor-Leste valoriza nia amizade ho Brazil ne’ebé dura ona ba tempu naruk, parseria ida ne’ebé bazeia iha solidariedade no aspirasaun komun. Ita hein atu hametin liután ita nia kooperasaun iha área sira interese komún nian, hodi promove dezenvolvimentu sustentável no ligasaun entre povu ho povu.”
Prezidente hatudu ninia konfiansa katak ho lideransa Embaixadór Leal nian, relasaun bilaterál sira sei kontinua sai buras, hodi kontribui ba pás no prosperidade iha nasaun rua ne’e.
