Konstrusaun Uma Dignu iha Taiubu-Atsabe hetan ona konkluzaun 80%

Atsabe, www.news-viptv.com – Konstrusaun Uma Dignu iha Aldeia Taiubu- Atsabe, Munisipiu Ermera hetan ona konkluzaun 80%, Família Avo Paulo hato’o agradese ba Prezidente Ramos-Horta, Kuarta (06/08/2025).

Iha komunikadu imprena ne’ebe redasuan simu, esplika sentimentu kontente no agradeesimentu mak domina iha uma Avo Paulo ho nia família iha Aldeia Taiubu, Suku Lasaun, Postu Atsabe, tanba hetan ajuda konkretu husi Prezidénsia Repúblika liu husi programa Uma Dignu.

Ekipa Prezidénsia, liu husi Unidade Serbisu Sosiedade Sivil no Asuntu Sosiál, hala’o vizita ba familia ne’e atu hare’e direta progresu konstrusaun, ne’ebé atu sai uma residénsia foun ida ho estandarte seguru no dignu.

Avo Paulo ho nia família fó testemuña dehan, “Tinan barak ami hela iha fatin ai-hun no fatuk kuak ikus mai muda ba Uma didin ida, tempu udan no loron-manas bele halo ami la seguru. Agora ami sente moris di’ak tanba Prezidente hatán ami nia hakarak.”

Ekipa téknika halo observasaun direta hodi avalia situasaun moris familia ne’e nian, ho suporta no proposta formal husi Xefi Suku Lasaun Abrão da Conceição. Husi ne’e, Prezidente Repúblika Jose Ramos-Horta autoriza lansamentu konstrusaun, ne’ebé komesa iha fulan Maiu 2025.

To’o agora, progresu konstrusaun uma ne’e hetan ona 80% kompleta ho kuartu tolu, sala vizita, sala han, Varanda no dapur, haris fatin,ketak inklui mobiliares base.

Programa Uma Dignu ne’e mak parte husi vizaun Prezidente Repúblika nian atu fó resposta ba nesesidade urgente sosiál, espesiálmente ba familia sira ne’ebé kbi’it naton iha área rural.