August 18, 2025 | 23:02 Timor Leste
Manufahi, www.news-viptv.com – Oan husi eroi Nicolao Lobato, Jose Lobato konkorda no aseita ho hanoin Xefi Estadu ne’ebe hanoin atu transforma Binani sai fatin Turizmu Istoriku.
Binani, ne’ebe lokaliza iha Suku Mindeli, Postu Administrativu Turiskai, Munisipiu Manufahi sai fatin ikus ba resistensia Prezidenti Nicolau Lobato ne’ebe mate hafoin hetan tiru husi military Indonesia iha 31 Dezembru 1978.
Iha selebrasaun ba loron aniversariu Forsa Armada Libertasaun Timor-Leste (FALINTIL) ba dala 50, Binani sai mos fatin selebrasaun hodi komemorasaun loron istoriku FALINTIL tamba fatin refere sai fatin ikus ba eroi Nicolau Lobato.
Iha nia deskursu, Prezidente Republika (PR) Jose Ramos-Horta hateten, Governu hamutuk ho Ministeriu Estatal no autoridade Municipiu atu hare’e manutensaun fatin ida ne’e (Binani, red), ba nia Estrada, uma, be’e, eletrisidade no jestaun, para fatin ne’e sai turistiku i bele benefisia populasaun, haleu aldeia foun ruma iha fatin ne’e.
“Governu sei hare’e buat sira ne’e. Para halo jardin Ida nebe ke simboliku omenajen ba eroi nasional ba Nicolau Lobatu,” hateten PR Ramos-Horta, Sabadu (16/8/2025).
Governu, epslika xefi estadu, konkorda atu tau orsamentu ba 2026, maibe mos hare’e setor privadu iha Timorense para halo buat ruma iha ne’e para nune’e fatin ne’e sai turistiku.
Alende ne’e, nia mos hateten, sei koalia nafatin ho parte Indonesia, inklui ho Prezidenti Prabowo hodi bele hare ruin Nicolao Lobato nian ne’ebe durante ne’e sedauk hetan.
“Ami hakarak Nicolau Lobato nia ruin ate agora seidauk iha rezultadu 100%, ha’u Espera hasoru Prezidente Prabowo iha Timor-Leste hau sei husu ba nia no sai simboliku bo’ot ba no Prezidente Prabowo mak entrega mate restu Nicolau Lobato,” dehan xefi estadu.
Iha fatin hanesan, Jose Lobato hateten, nia konkorda ho hanoin xefi estadu tamba bele fo benefisia ba populasaun sira iha Binani.
“Prezidente Republika dehan atu loke jardim Nicolau Lobato iha ne’e, ne’ebe signifika mos husi Estado no tau fasilidade iha ne’e entaun ami hanoin bele ajuda area Binani, Suku Mindeli husi ijolasaun,” nia dehan.
Iha sexta (15/8/2025), Komisaun Organizadora realiza ona misa selebra ba Loron Komemorasaun FALINTIL ba dala-50 ne’ebe lidera husi Amo Vigario Jose Da Silva.
