August 7, 2025 | 16:08 Timor Leste
Dili, www.news-viptv.com – Hare’e ba relasaun bilateral iha setor oi-oin ne’ebe durante ne’e Timor-Leste halo ho Australia, Prezidenti Republika (PR) Jose Ramos-Horta hateten, Austrália sai nu’udar parseiru ida ne’ebé metin iha Timor-Leste nia viajen ba estabilidade no prosperidade.
Prezidente no Laureadu Nobel ba Pás Jose Ramos-Horta deklara assuntu ne’e wainhira simu vizita Ministra Dezenvolvimentu Internasionál Austrália nian, Dra. Anne Aly Kuarta (6/8/2025), iha Palásiu Prezidensiál Nicolau Lobato.
“Austrália sai nu’udar parseiru ida ne’ebé metin iha Timor-Leste nia viajen ba estabilidade no prosperidade. Enkuantu ita prepara atu tama ba ASEAN, ita valoriza kooperasaun kontinua iha komérsiu, investimentu, no ligasaun povu ho povu ne’ebé sei dudu kresimentu sustentável ba ita-nia nasaun rua ne’e,” hateten PR Ramos-Horta.
Iha sira nia inkontru, foka liu ba objetivu dezenvolvimentu partilladu, kolaborasaun ekonómika, no Timor-Leste nia adezaun ba ASEAN.
Austrália no Timor-Leste iha amizade kleur ona, ne’ebé hametin liuhusi ligasaun forte entre povu ho povu. Dezde Timor-Leste nia independénsia iha tinan 2002, Austrália sai nafatin ninia parseiru dezenvolvimentu no seguransa ne’ebé boot liu, Nasaun rua ne’e ativamente parseiru iha kooperasaun sira iha setór oioin, inklui Dezenvolvimentu, Diversifikasaun Ekonómika, programa Mobilidade Traballu Pasífiku Austrália (PALM), projetu infraestrutura boot sira, Edukasaun, Seguransa no Defeza,ligasaun entre Povu, Apoiu baTimor-Leste nia membru OMK no adezaun ba ASEAN.
Ministra Anne Aly viizta Timor-Leste hodi partisipa mos Konferénsia Ekonómika no Negósiu Timor-Leste–Austrália daruak (TLAUCON 2025), ne’ebé hala’o iha loron 6–8 fulan-agostu iha Sentru Konvensaun Dili. ko-host husi Governu Timor-Leste no Austrália, ho objetivu atu hametin lasu ekonómiku liuhusi promove investimentu iha setór xave sira, inklui agrikultura, turizmu, manufatura, no rekursu minerál sira.
