August 21, 2025 | 15:24 Timor Leste
Dili, www.news-viptv.com – Prezidente Repúblika José Ramos-Horta, hahu viazem estadu ba Japaun husi loron 21 to’o loron 29 fulan Agostu, nu’udar konvidadu Governu Japaun nian, hodi partisipa Loron Nasionál Timor-Leste nian iha Expo Osaka 2025.
Vizita ida-ne’e subliña lasu amizade no parseria ne’ebé metin no dura entre Timor-Leste no Japaun. Japaun sai nu’udar apoiante metin ba Timor-Leste dezde restaurasaun independénsia, fó asisténsia vital iha área infraestrutura, dezenvolvimentu kapitál umanu, governasaun, no harii pás.
Prezidente Ramos-Horta valoriza Timor-Leste nia parseria metin ho Japaun, hodi hateten katak “Japaun sai hanesan parseiru ida-ne’ebé metin ba Timor-Leste dezde restaurasaun ita-nia independénsia. Vizita ida-ne’e hanesan oportunidade ida la’ós de’it atu selebra ita-nia amizade maibé mós atu trasa dalan foun ba kooperasaun ne’ebé fó benefísiu ba ita-nia povu.”
Programa Destake sira, Durante iha Japaun, Prezidente Ramos-Horta sei halo atividade importante lubuk ida:
- Enkontru ho Primeiru-Ministru Japaun – Prezidente Ramos-Horta sei hala’o almosu ofisiál traballu ho Primeiru-Ministru, iha ne’ebé diskusaun sira sei foka ba aprofundamentu kooperasaun bilaterál iha área sira hanesan dezenvolvimentu ekonómiku, oportunidade investimentu, enerjia renovável, no pás no seguransa rejionál.
- Expo 2025 Osaka, Kansai – Prezidente sei partisipa iha Loron Nasionál Timor-Leste nian iha Expo Mundiál, iha ne’ebé Timor-Leste sei hatudu ninia kultura, istória, no aspirasaun sira nu’udar parte ida husi komunidade globál. Selebrasaun ida-ne’e fó oportunidade atu destaka nasaun nia realizasaun sira no potensiál futuru nian iha turizmu, investimentu, no interkámbiu kulturál.
- Konferénsia Ázia HPAIR 2025 – Prezidente Ramos-Horta sei hato’o diskursu prinsipál iha inisiativa konjunta ida ne’ebé organiza hosi Harvard no Universidade Tokyo, Konferénsia Projetu Harvard ba Relasaun Ázia no Internasionál (HPAIR). Ninia diskursu sei reflete Timor-Leste nia viajen reziliénsia nian no ninia perspetiva sira kona-ba kooperasaun globál, lideransa, no integrasaun rejionál.
- Vizita ba instalasaun sira Tsuneishi nian – Prezidente sei vizita instalasaun Tsuneishi nian iha Fukuyama, hodi partisipa iha entrega ró foun ida no vizita instalasaun sira empreza nian, tuir estabelesimentu Tsuneishi nian foin lalais ne’e iha Timor-Leste iha tinan 2024.
- Universidade Nasoins Unidas iha Tokyo – Prezidente sei hato’o palestra ida iha Universidade ONU, partiila lisaun husi Timor-Leste nian esperiénsia kona-ba harii pás, demokrasia, no dezenvolvimentu sustentável. Nia mós sei subliña importánsia hosi kolaborasaun internasionál hodi responde ba mudansa klimátika, dezigualdade no dezafiu seguransa globál, dehan Xefi Estadu.
Liu husi vizita ida ne’e, Timor-Leste reafirma ninia kompromisu atu hametin parseria ho Japaun no kontribui ativamente ba diálogu rejionál no globál. Kompromisu hirak-ne’e sei destaka papél kresimentu Timor-Leste nian nu’udar demokrasia joven, konstrutór ponte iha Ázia no Pasífiku, no nasaun ho kompromisu metin ba pás, kooperasaun, no dezenvolvimentu sustentável.
