August 20, 2025 | 22:39 Timor Leste
Dili, www.news-viptv.com – Prezidente no Laureadu Nobel ba Pás, Jose Ramos-Horta kondekora eroi FALINTIL sira ho Kondekorasaun Aas Liu Estadu nian iha komemorasaun Aniversariu ba dala-50 FALINTIL.
Iha okaziaun istóriku aniversáriu Forças Armadas de Libertação Nacional de Timor-Leste (FALINTIL), ba dala 50, Prezidente no Laureadu Nobel ba Pás, Jose Ramos-Horta, kondekora titlu póstumu ho onra aas liu nasaun nian ba Eroi Na’in Haat ne’ebe luta ba independénsia Timor-Leste nian, iha Serimónia solene ne’ebe hala’o, Kuarta (20/8/2025), iha Tasi-Tolu.
Tuir Dekretu Prezidente Repúblika Nú. 82/2025, ne’ebé asina iha loron 19 fulan-agostu tinan 2025, iha Palásiu Prezidensiál Nicolau Lobato, Prezidente Ramos-Horta kondekora titlu póstumu ho Grande Kolar Orden Timor-Leste nian ba Matebian Prezidente Nicolau dos Reis Lobato “Tau Fui”.
Aleinde ne’e, tuir Dekretu Prezidente Repúblika Nú. 83/2025, ne’ebé asina mós iha loron 19 fulan Agostu, Prezidente Ramos-Horta kondekora titlu póstumu ho Grau Kolar Orden Timor-Leste nian ba Kombatente Libertasaun Nasionál na’in tolu ne’ebé respeitadu: 1. Joaquim Saldanha “Naha Berek”, 2. Artur do Nascimento “Tripas”, 3. Dulce Cruz “Wewe Sahe”
Prezidente Ramos-Horta afirma, “Ohin, iha aniversáriu FALINTIL nian ba dala 50, ita fó onra ba mandatu konstitusionál hodi rekoñese lideransa supremu Prezidente Nicolau Lobato nian no korajen imensu husi eroi sira hanesan Joaquim Saldanha, Artur do Nascimento, no Dulce Cruz. Sira-nia legadu mak livre no soberanu Timor-Leste ne’ebé ita moris iha ohin loron.”
Serimónia ida-ne’e marka pasu signifikativu ida iha kompromisu Estadu nian hodi fó onra ba pesoal hotu-hotu ne’ebé dedika sira-nia moris ba independénsia Repúblika Demokrátika Timor-Leste.
