July 7, 2025 | 01:09 Timor Leste
DILI, www.news-viptv.com – Komandu Polísia Nasional Timor-Leste (PNTL) liuhusi Diresaun Servisu Investigasaun Kriminal Nasional (DSIKN) kaptura ona suspeitu ne’ebe oho vitima Peregrina da Conceição naran istimadu Amina, ho idade tinan 23 ne’ebe mate isin hetan iha area Jakarta-2, Munisipiu Ainaro.
Ba jornalista sira iha konferensia imprensa, Porta Voz Komandu PNTL, Superintendente Polísia João Belo dos-Reis informa hafoin identifika mate isin no halo tracking informasaun ne’ebe halo husi Servisu Informasaun Polísia (SIP), Servisu Investigasaun Kriminal hamutuk ho Komandu PNTL Munisipiu Ainaro, Komandu PNTL Munisipiu Likisa, ikus iha Domingu (06/07) kalan iha oras 21:00, suspeitu ho inisial MD kaptura iha Munisipiu Dili area Dom Aleixo ninian.
“Agora dadaun hakarak informa ba públiku katak Suspeitu iha ona Polísia nia liman, iha sela detensaun Eskuadra PNTL Dom Aleixo Comoro,” dehan Superintendente João Belo dos Reis ba jornalista sira, Segunda (7/7/2025), iha Kuartel Jeral PNTL, Kaikoli, Dili.
Aktual Diretor Diresaun Servisu Investigasaun Kriminal Nasional (DSIKN) ne’e salienta tan katak kronologia husi akontesimentu ne’e nia parte sedauk bele fo sai nia detaillu tamba tama ona prosesu investigasaun.
“Mate isin orseik kedas evakua ona mai Dili, agora iha ona Hospital Nasional Guido Valadares (HNGV) hodi hein prosesu autopsia. Prosesu Autopsia sei termina katak, mate ne’e kauza husi oho ka ema baku, investigasaun sei lao hela no ema ne’ebe ita deskonfia envolve iha kazu ne’e, ita asegura ona no vitima origem husi Suku Asumanu, Munisipiu Likisa, suspeitu sei kumpri iha sala detensaun durante oras 72 nia laran hafoin sei aprezenta ba Ministeriu Públiku,” nia dehan.
Iha Domingu (6/7) komunidade relata hetan mate isin feto ida ho nia motoro inklui ekipamentu balun iha rai lolo bo’ot ida iha Jakarta-2, Munisipiu Ainaro.
