August 19, 2025 | 00:25 Timor Leste
DILI, www.news-viptv.com – Hodi defini fronteira maritima ida-idak nia nasaun, Timor-Leste ho Indonézia hahu halo negosiasaun fronteira maritima nian iha Dili, Tersa (19/8/2025).
Primeiru-Ministru (PM), Kay Rala Xanana Gusmão iha negosiasaun ne’e fó-hanoin bá delegasaun hosi Indonézia ho Timor-Leste iha negosiasaun kona-bá Fronteira Marítima tenke fiar-malu no respeita-malu, nune’e bele hetan rezultadu di’ak bá parte rua.
“Ita bele hahu ona maibe hau fo hanoin ba sira katak ita iha nafatin porsaun segementu ida iha Oecusse. Hau husu sira atu fo hanoin ba governu katak ida neeba ita tenke remata. Maibe Xefi Delegasaun ne’e ninia komentariu hateten sira mai ho komitmentu tomak atu halo buat ruma tuir lei internasional no ami dehan negosiasaun hanesan nee persiza fiar malu, respeitu malau. Tamba ne’e ma kami fiar katak, Indonesia kompremetidu tebes atu resolve problema maritima,” dehan PM Xanana.
PM Xanana Gusmão dehan, kona-bá negosiasaun bá kestaun Fronteira Maritima ne’e nia parte husu ona desde uluk kedan, maibé Indonézia kaer-metin prinsípiu tuir Lei Internasionál katak, Rai mak komanda Tasi.
Nune’e, iha momentu Prabowo Subianto simu pose hanesan Prezidente Repúblika Indonézia nian, PM Xanana hasoru-malu no husu dala ida tán atu realiza negosiasaun ne’e maka hetan kedan resposta pozitivu no ohin bele komesa ona iha Dili.
“Ida ne’e atu bele hetan buat ruma ne’ebe reforsa tan ita nia amizade. Ne’e duni, ita hotu hein katak sira komesa ona ho diskusaun, buat ne’e lalais no la kleur demais, laos aban bainrua kedan mais iha tempu ne’ebe oportunu sei diak tebes ba ita hotu,” Xanana Gusmão hateten.
Maski nune’e, líder nasionál ne’e fiar katak, delegasaun ne’ebé hetan konfiansa hosi Prezidente Repúblika Indonézia, Prabowo Subianto mai ho kompromissu ida atu servisu hamutuk no rezolve tuir Lei Internasionál ne’ebé sira opta.
Delegasaun Indonézia iha ema na’in-24 Xefia hosi Laurentius Amrih Jinangkung, S.H.,LL.M nu’udár Embaixadór Repúblika Indonézia nian iha Santa Sé (Vatikanu) no atuál Diretór Jerál Direitu Internasionál no Tratadu sira iha Ministériu Negósiu Estranjeiru Repúblika Indonézia, akompaña hosi Embaixadór Indonézia iha TL, Okto Dorinus Manik.
Delegasaun Timor-Leste nian lidera hosi Diretora-Ezekutiva Gabinete Fronteira Terrestre no Marítima, Elizabeth Exposto akompaña hosi Embaixadór Timor-Leste bá Indonézia, Roberto Soares.
Tuir ajenda, ronda da-huluk negosiasaun Fronteira Marítima entre nasaun rua hahú hosi loron 19 to’o 20 Agostu tinan 2025.
Ofisiál seniór sira hosi nasaun rua sei involve iha diskusaun estruturadu ho objetivu atu delimita Fronteira Marítima permanente ida entre nasaun rua.
